एउटा आँखा

Author : दिपा एवाई राई
Published on : April 05, 2012


  
दिपा एवाई राई

अन्धकार रातमा

माधुर्य छर्ने जुन झै

दिनको प्रतिनिधित्वमा

उदाउने सूर्य झै

कलाका

सृजनाका

मायाका आँखाहरुमा

म खोजि रहेछु

एउटा आँखा

जसले देख्नेछ

बुझ्नेछ

र परिभाषा गर्ने छ मलाई

जो म यहाँ

सदियौदेखि

मानवबिच हराई रहेकी छु

 

किन देख्दैनन् कसैले मलाई  ?

 

अनगिन्ती ........

प्रिय सुन्दर आँखाहरु माज

म आफू आफैलाई खोजी रहेछु

 

सुन्य..........सुन्य..

बिल्कुल सुन्य

बरु जिज्ञासका आँखाहरु

उभिएर पर्खाल बनेका छन्

त्यसैले स्वयम्भुको निश्छल र शान्त आँखासँग

भन्न मन लाग्दैछ

मायादेवी हुँ म, मायादेवी

तिमीलाई जन्माउने

एउटी आमा

 

पुन: म प्रत्येक आमाहरुको

आँखामा खोज्छु आफैलाई

 

आँसुका सागर सुकेर

मोतीविन्दु लागेका

आमाहरुका आँखा

अगेनाका बाक्ला धुवाले टालीएका छन्

लाटीएका आमाहरुबिच

म उभिरहन्छु

देख्दैन त कसैले ?

 

"आमा !"  (म बोल्छु, बोलाउछु)

प्रतिउत्तरमा

दह्रो पहेलो दाताका पंक्तीहरुसँग

गनाउने श्वासका ढकार आउँछन्

 

यस बेला भएको छु

एउटा साईलोप्स म

निरन्तर खोजी रहन्छु मेरो अस्तित्व

 

मेरी गोरी दिदीका

लेन्स लगाएका

सुन्दर ती आँखाहरुमा

स्टार क्लोनका सिरीज प्ले भईरहेछ

 

सोच्छु म गहिरो विचारले

अब कोलम्बसको पाईला पाईलामा

म अमेरीगो हिड्नु पर्छ

ती एउटा भाषाको

एउटै बोलाई

एउटै बुझाई

एउटै उद्देश्यहरुमा

अँह ! कति जाती हामी सबैलाई.....

 

भो चाहिन्दैन मलाई

दुई आँखा

तिमीले नै लैजाउला

महादेव !

झनै तेस्रो आँखा

मलाई के को लागी र ???