भुत्ते मन्त्रीहरू र जेष्ठ १४ गते

Author : टंक सम्वाहाम्फे
Published on : June 03, 2011


  
टंक सम्वाहाम्फे

सारा नेपाली जनताको

सपना बोकेर

देशको  उच्च ओहदामा आसीन

प्रधानमन्त्री ज्यू

मन्त्री ज्यूहरू

सभासद् ज्यूहरू

पार्टीका नेता र कार्यकर्ता ज्यूहरू

तपाईहरूलाई थाहा

हामी जनताको मत पाएर

त्यहाँ पुग्नु भएको

कति समानुपातीकको घोडा चढेर

सांसद भवन देख्नु भएको

हामी जनतालाई पनि

थाहा

कति माननीय ज्यूहरू

राजनितीको नजानेर

मन्त्री हुनु भएको

कतिले राजनितीलाई खेती गरेर

किसान बनाउँनु भएको

तर खोई कहाँ चल्दैछ

तपाईको राजनिती ?

त्यो हामी जनतालाई थाहा छैन

किनकी सांसद भवन छिरेपछि

जनताको पसीनालाई

बाज्दै जुझ्दै बाडी खाएको

हामी प्रत्यक्ष देख्दैछौं

हामी प्रत्यक्ष बुझ्दैछौ

सायद त्यसैले होला

तपाईहरूले गर्ने राजनिती

भारतले पो गर्दोरहेछ

चीनले पो गर्दोरहेछ

अर्कै गोलार्द्धको देश

अमेरीकाले पो गर्दोरहेछ

हामीलाई थाहा

साङलोमा बाधिएको कुकुर

केवल झम्टिन सक्दछ

तर त्यसले टोक्न सक्दैन

त्यस्तै तपाई पनि पार्टी भित्रको

प्रतिवन्धित मान्छे

जनतालाई ठुल्ठुलो भाषण दिन शिवाय

जनतालाई ठुल्ठुलो सपना देखाउँन शिवाय

अरु के गर्न सक्नु हुन्छ ?

पार्टी विभाजन गरेर

जनतालाई भाग, भाग लगाएर

जनमस्तिष्क विभाजन गर्दै हुनुहुन्छ

जनमत चिर्दैहुनुहुन्छ

जनबिचार फार्दै हुनुहुन्छ

कसैलाई कम्युनिष्टमा

कसैलाई कांग्रेसमा

कसैलाई फोरममा

अथवा दर्ता भएका सबै पार्टीहरूमा

आवद्ध हुन विवश बनाउँनु हुन्छ

नेता ज्यू

मन्त्री ज्यू

के यसरी नै जनतालाई

अनिर्णयको वन्दि बनाएर देश चल्छ ?

के यसरी नै सम्विधान बन्छ ?

के यसरी नै नितीनियम बन्छ ?

तपाइलाई थाहा

आज नयाँ नेपालको नयाँ सम्विधान जारी हुने मिति

२०६८ साल जेष्ठ १४ गते शनिवार

खोई कहाँ जारी भो त्यो सम्विधान ?

के हामी जनतालाई

सम्विधान चाहिँदैन ?

नितिनियम चाहिँदैन ?

देश चाहिँदैन ?

हामी देशवासी सवैलाई

नयाँ सम्विधान चाहिएको

तर खोइ नयाँ सम्विधान

प्रधानमन्त्री ज्यू

मन्त्री ज्यूहरू

सभासद् ज्यूहरू

पार्टीका नेता कार्यकर्ताज्यूहरू

त्योहदाको कसम खाएर

आफ्नो जिम्मेवारीको प्रतिवद्धता गरेर

देशको विधायीका बन्नु भएको

हामीलाई थाहा

तर तपाईहरू

भुत्ते पो हुनुहुदो रहेछ

नालायक पो हुनुहुदो रहेछ

अयोग्य पो हुनुहुदो रहेछ

किनकी तोकिएको मितिमा

नयाँ सम्विधान जारी गर्न सक्नु भएन

नेपाल नेपालीको

भविष्य आशा बोकेर

आफ्नो असक्षमता प्रदर्शन गरी सक्नु भो

तर पनि अझै त्यसलाई

निर्णायक तहमा पुर्याउँने काम

तपाईहरू कै हो

नयाँ नेपालको परिकल्पना गरेर

संघीयताको वकालत गरेर

आत्मनिर्णयको वाचा वाँधेर

देशलाई देश बनाउँने अठोट लिएर

जव काठमाडौ पस्यौ

तव आफ्नो अञ्चल,जिल्ला विस्र्यौ

तव आफ्नो गाउघर,आफन्त विस्र्यौ

तव आफ्नो प्रतिवद्धता विस्र्यौ

अनि नयाँ सम्विधान वनाउँनै विस्र्यौ

!भुत्ते प्रधानमन्त्री ज्यू

!भुत्ते मन्त्री ज्यूहरू

!भुत्ते सभासद् ज्यूहरू

!भुत्ते पार्टीका नेता कार्यकर्ता ज्यूहरू

अव तपाईहरूले देश वनाउँनु हुन्न

नयाँ सम्विधान वनाउँनु हुन्न

शान्ति,अमनचयन कायम गर्नु हुन्न

बरु देशको आर्थिक भण्डार रीत्याउनु हुन्छ

देशको जल भण्डार बेच्नु हुन्छ

अन्य देशसंग आफूले चाहे जस्तै

घातक सम्झौता गर्न तयार बन्नु हुन्छ

हामीलाई थाहा भैसक्यो

भुत्ते खुकुरीको नियती बोकेर

भस्मे फाड्न अवश्य सकिन्न

जनतालाई झुक्याएर

सत्ता सम्हाल्न सकिन्न

हामीले बुझी सक्यौ

तपाईहरू सबै भुत्ते खुकुरीहरू

वेअर्थ त्योहदामा बस्न सुहाउँदैन

ओर्लहदाको कुर्सीबाट

अव हामी नागरिक शासक बन्नेछौ

अव नेपाली जनता मिलेर

नेपाल आमाको निर्माण गर्नेछौ

केहि काम गर्न नसक्ने

! भुत्ते प्रधानमन्त्री ज्यू

! भुत्ते मन्त्री ज्यूहरू

! भुत्ते सभासद् ज्यूहरू

! भुत्ते पार्टीका नेता कार्यकर्ता ज्यूहरू

यो माटोले तिमीहरूलाई श्राप दिनेछ

हामी जनताले दण्ड दिनेछौ

त्यसको भागेदार यिनै भुत्तेहरू हुनेछन्