आमा

Author : Mina Bantawa
Published on : December 27, 2009


  
Mina Bantawa
आमा नसोचिदिनू है निषठुरी रैछ छोरी भनी
तिम्रो तस्विर सिरानीमा राखेर सुतेकै हुन्छु
तिम्रो त्यो ममता यो छातीभरि सम्हालेर राखेकै छु
हरेक पल मातातीर्थ औंसीमा तिम्रो पूजा गरेकै छु,

पुसमाघे जाडो गुन्द्री र सुकुल सुकाई आँगनमा
तोरीको तेल तालुमा ठोकी बसाई काखमा
आफ्नो साडीको बक्कुलो सिलाई कर्मी है चरी झैं
न्यानो पारी सुताउँथ्यौ लुटुक्क यसोदा मैया झैं,

बिर्सेको छैन हल्लाउँदै कोक्रो फकाउदै सुताउँथ्यौ
पिठ्युमा बोकी हातमा टुकी सात मुलुक पुर्या‍उँथ्यौ
ज्वरो मात्र आउँदा धामी र जैसी ओखती पिलाउँथ्यौ
तताई तेल मालिस गरी मलम पट्टी लगाउँथ्यौ,

पटुकीले सेपी ढिकी र जातोमा सँगसँगै लैजान्थ्यौ
नानीलाई दूध पुग्दैन भनी ज्वानोको रस पिउँथ्यौ
एकछिन पनि नदेख्दा मलाई आतिदै खोज्दथ्यौ
हातमा थमाई सिलेट र खरी क लेख्न सिकाउँथ्यौ,

कु-कु हा भनि लुकामारी खेल्न तिमीले सिकाउँथ्यौ
बेहुला र बेहुली पुतली बनाई तिमीले खेलाउँथ्यौ
बदमास गर्दा कहिलेकाही घोचो लि खेद्दथ्यौ
घर वरिपरि म चाँहि भाग्थें तिमी चाँहि थाक्दथ्यौ,

पाली र टाली सम्राट पार्यौ विदेश जाने भए म
जहिले पनि चिन्ता छ तिमीलाई नुन भुटुन टार्न
आज पनि न्यास्रो को न्यास्रै छ तिम्रो मुहार
दक्षिणकालीमा गै माग्दैछौ अरे मेरो लागि गुहार,

दस महिनासम्म गर्भमा राखी यो संसार देखायौ
तोते बोलीदेखि हिंड्न ताते भनी सिकायौ
साच्चै तिमी महान छौ धन्यवाद कोटि कोटि
सक्दिन ऋण चुकाउन यो जुनीमा गरिकन जति जति ।
 

हाल ईजरायल