कला राई All Literature | Contact Author

यो धर्तीको सवैभन्दा

नयाँ गीत गाएर,

सम्झनाको सवैभन्दा पुरानो

प्रेम सन्देस बोकेर

उडिरहने प्रिय बादल

र

मेरो प्रियतमको अनुहार

आइरहन्छ आँखामा एकसाथ,

समयलाई चुनैति दिएर दौडने

इलेक्ट्रोनिक रेल

आकाशको रङ्ग सरेको

नीलो समुद्र

ठूला सुपर मार्केटका

विभिन्न लेटेस्ट मोडेलका

खाना, लुगा र आधुनिक उपकरण

कतै अडिदैन

टाइम स्क्वायरको

समय सूचक घडीमा समेत

यो मन,

पहाडका चौतारीमा

मिल्न आइपुग्ने

दूइतर्फी बाटाहरू

दुई नदीहरूको संगम

दुई फूलहरूको

उस्तै सुवास बोकेर

हिँडिरहेछौं टाढा-टाढा

एक्ला-एक्लै हामी,

तर पनि

धर्तीको अर्कै कुनामा

उभिएको मेरो प्रियतम

म

तिमीलाई पठाइरहेछु

मेरो आँखाभरीको सपना

मेरो मुटुको रङ्ग मिसिएको माया

अनि

धर्ती र बादलबीच

साङपाङ,भोजपुर

हालःहङकङ ।