|
(श्रृजना अनलाईन कविता प्रतियोगितामा सान्त्वना)
त्यो सुन्दर मेरो गाउँ
आँगनको त्यो आरु फुल
गुराँसे पाखा
भञ्याङ्गको त्यो बूढा वरपिपल
र
टारबारी सिमलको भुवा †
बिरानो भो ढाकर र तोक्मा
अरुण गडतीरको त्यो अक्केरे भिर
सभाय दोभानको त्यो लामो दुवालो
असला, बुदुना, काभ्रे र सहर,
के गर्दै होलान् गाउँकाहरु….-
हिंजो खाडी भासिएका ति बिर्खेहरु….
मुग्लान छिरेका हर्केहरु…….
र
जंगल पसेकाहरु…………
फर्किए या उतै छन् ।
बिरानो भो गाइने दाईको त्यो मीठो सारङ्गी धुन
हाक्पारे र पालामको रसिलो भाका
डम्फु र च्याब्रुङ्ग गुञ्जिएको रन्को
लोप हुनै लागेको पञ्चै बाजा,
के गर्दै होलान् गाउँकाहरु….-
हिजो भत्काएका टिमुरे भञ्याङ्गको त्यो बिजुली पावर हाउस
हेवा खोलाको झोलुङ्गे पुलहरु
र
जलेका झुप्राहरु
बनाए वा उस्तै छन् ।
बिरानो भो आमाको न्यानो काख
कमेरे झुप्रोको त्यो सिकुवा र अगेना
विधुवी भाउजूको त्यो आँखाभरि आँशु
टुहुरा बच्चाहरुको बिलौना,
के गर्दै होलान् गाउँकाहरु….-
हिजो लडेका नेपाली छोराहरु
खिचतानीमा पिसीएका सोझा मेरा गाउँलेहरु
र
फाट्दै गएका मनहरु
एउटै मालामा उनिए या उस्तै छरपस्टी छन् ।
(श्रृजना अनलाईन कविता प्रतियोगितामा सान्त्वना विजेता कवि टोपराज राईलाई बधाई छ)
सृजनशील साहित्य समाज हङकङ |
Main Categories
Visitor's Comments !
